काठमाडौं– सत्तारुढ दल नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले आफू र अर्का अध्यक्ष केपी शर्मा ओलीद्वारा प्रस्तुत राजनीतिक प्रतिवेदनमा अमेरिकाको इण्डो–प्यासिफिक रणनीतिबारे गरिएको टिप्पणी फिर्ता लिने बताएका छन् ।

प्रचण्ड र ओलीद्वारा प्रस्तुत राजनीतिक प्रतिवेदनमा अमेरिकाको इण्डो–प्यासिफिक स्ट्राटेजी (आईपीएस) चीनलाई घेरा हाल्नका लागि ल्याइएको भन्ने टिप्पणी गरिएको थियो ।

तर, केही केन्द्रीय सदस्यहरुले उक्त टिप्पणीप्रति आलोचना गरेपछि प्रचण्डले त्यसलाई फिर्ता लिने प्रतिवद्धता जनाएका हुन् ।

जारी केन्द्रीय कमिटीको बैठकमा सदस्यहरुले उठाएका प्रश्नको जवाफ दिने क्रममा प्रचण्डले आइतबार आइपीएस ‘चीनलाई घेरा हाल्नका लागि ल्याइएको’ भन्ने शब्द फिर्ता लिने बताएका हुन् ।

अध्यक्षद्वय ओली र प्रचण्डले प्रस्तुत गरेको राजनीतिक प्रतिवेदनको बुँदा नम्बर १ अन्तर्गत पृष्ठ ८ मा अमेरिकाले चीनलाई घेरा हाल्नका लागि इण्डो–प्यासिफिक रणनीति ल्याएको उल्लेख गरिएको छ । प्रतिवेदनमा भनिएको छ–‘संयुक्त राज्य अमेरिकाले आफ्नो अति महाशक्तिको स्थिति कायम राख्न र विश्वमा आफ्नो एकछत्र प्रभुत्व बनाइराख्न नयाँ नयाँ रणनीतिको विकास गरिरहेको छ । यसै सन्दर्भमा हिन्द महासागर वरिपरिका क्षेत्रहरुमा आफ्नो प्रभाव विस्तार गर्ने, प्रभुत्व कायम गर्ने र पहिलो आर्थिक शक्तिका रुपमा उदाउँदै गरेको चीनलाई घेरा हाल्ने र कमजोर पार्ने सैन्यरणनीतिका रुपमा इण्डो–प्यासिफिक रणनीति अगाढि बढाएको छ ।’