काठमाडौं- काठमाडौंमा भएको सवारी दुर्घटनामा २ जनाको मृत्यु भएको छ ।

ट्राफिक चेकिङका लागि रोक्न खोजेको मोटसाइकल टिपरमा ठोक्किँदा मोटरसाइकल चालकको मृत्यु भएको छ ।

कलङ्की नजिकै खसी बजारमा शनिबार राति १० बजे बा ४ ख ३६६९ नम्बरको टिप्परमा बा ६६ प ४४९० नम्बरको मोटरसाइकल ठोक्किँदा कीर्तिपुरको मच्छेगाउँका शैलेस बस्नेतको ज्यान गएको प्रहरीले जनाएको छ ।

दुर्घटनामा घाइते भएका बस्नेतको बल्खुको वयोधा अस्पतालमा उपचारका क्रममा मृत्यु भएको हो । ट्राफिक प्रहरीले जाँचका लागि टिप्परलाई रोकेको थियो ।

मोटसाइकल चालकले ट्राफिक चेकिङका लागि रोक्न खोज्दा टिप्परमा ठोकिएको प्रहरीले जनाएको छ।

यसैबीच, काठमाडौंको नागार्जुन नगरपालिका–१ रानीवनमा बसको ठक्करबाट स्कुटर चालकको मृत्यु भएको छ ।

नागार्जुन नगरपालिका–१ स्थित सडकमा बा१ख ६६४५ नम्बरको बसले बा ८५ प १४९३ नम्बरको स्कुटरलाई ठक्कर दिँदा स्कुटर चालक धादिङकी ४८ वर्षीय लीला घलेको घटनास्थलमै मृत्यु भएको हो ।

दुर्घटनामा स्कुटर चालककी २६ वर्षीय छोरी प्रमिला घले गम्भीर घाइते भएकी छन् । गम्भीर घाइते घलेको मनमोहन अस्पताल स्वयम्भूमा उपचार भइरहेको प्रहरी प्रधान कार्यालयले जनाएको छ ।

ठक्कर दिने बस र चालकलाई प्रहरीले नियन्त्रणमा लिएर अनुसन्धान गरिरहेको छ ।