काठमाडौं – सत्तारुढ दल नेपाल कम्युनिस्ट पार्टी (नेकपा) का नेता भीम रावलले भदौ २६ गते नेकपाका दुई अध्यक्षले सहमतिमा गरेको हस्ताक्षरभन्दा बाहिर कुनै कार्य भएमा नेकपामा राजनीतिक दुर्घटना हुनसक्ने बताएका छन् ।

नेता रावलले बिहीवार ट्वीट गर्दै युवराज खतिवडालाई अमेरिकाको राजदूत र लोकदर्शन रेग्मीलाई बेलायतको राजदूतमा नियुक्त गर्न सिफारिस गरेकोप्रति संकेत गर्दै यस्तो बताएका हुन् ।

‘नेकपामा आन्तरिक द्वन्द्व र मतभेद चर्केको बेला समस्या समाधान गर्न भदौ २६ गते नेकपा, स्थायी कमिटीले निर्णय गरी अध्यक्षद्वयको हस्ताक्षरका साथ भदौ २९ गते जारी अपानि– निर्णयहरुको उल्लंघन भएमा संकटको पुनरावृत्ति हुनसक्छ,’ नेता रावलले ट्वीटमा उल्लेख गरेका छन् ।

उनले यस्ता निर्णयले देश, जनता र पार्टी हितमा आघात पर्नसक्ने भएकाले जिम्मेवारहरुको ध्यान जानुपर्ने पनि बताएका छन् ।

नेकपामा आन्तरिक द्वन्द्व र मतभेद चर्केको बेला समस्या समाधान गर्न गत भदौ २६ गते नेकपा, स्थायी कमिटीले निर्णय गरी अध्यक्षद्वयको हस्ताक्षरका साथ भदौ २९ गते जारी अपानि-निर्णयहरूको उल्लंघन भएमा संकटको पुनरावृत्ति हुनसक्छ।देश,जनता र पार्टीहितमा आघात पर्नसक्छ।जिम्मेवारहरूको ध्यान जाओस्।

— Bhim Rawal, PhD (@BhimRawal179) October 1, 2020