काठमाडौं – प्रमुख प्रतिपक्षी नेपाली कांग्रेसले नेताहरुको कोरोना परीक्षण गरेका छन् । केन्द्रीय कार्यसमिति बैठक बस्नुअघि उनीहरूले परीक्षणका लागि स्वाब दिएका हुन् ।

यसअघि कांग्रेसले असोज १९ मा बस्ने केन्द्रीय समितिको बैठकमा सहभागिता जनाउन सबै सदस्यहरूले कोरोना परीक्षण गराउनुपर्ने बताएको थियो ।

उक्त निर्णयअनुसार आज (बिहीवार) पार्टी कार्यालय सानेपामा केन्द्रीय सदस्यहरुको कोरोना परीक्षण गरिएको हो ।

कांग्रेस नेता कृष्ण सिटौलाले सबै नेताहरूको कोरोना परीक्षण गराइएको जानकारी दिए । उनले केन्द्रीय समिति बैठकमा महाधिवेशनको एजेण्डामाथि छलफल हुने बताए ।

कांग्रेसले केन्द्रीय समितिको बैठकबाट सडक आन्दोलनका कार्यक्रम तय गर्ने र संसदीय दलको बैठक बोलाएर संघीय संसद्को विशेष अधिवेशन माग गर्ने तयारी गरेको छ ।

यस्तै नेता रामचन्द्र पौडेलसहित २७ केन्द्रीय सदस्यले हालै दर्ता गराएको विरोध पत्रका बारेमा पनि बैठकमा छलफल हुने बताइएको छ ।