काठमाडौँ– नेपाल क्रिकेट संघ (क्यान) ले महिला तथा पुरुष राष्ट्रिय खेलाडीको वर्गीकरण पुन गर्ने बताएको छ ।

क्यानका अध्यक्ष चतुरबहादुर चन्दले बिहीबार विज्ञप्ति जारी गरि खेलाडी वर्गीकरण पुन हेरफेर हुने बताएका छन् ।

क्यानको असोज ६ गते चितवनमा बसेको बोर्ड बैठकले पुरुष तथा महिला क्रिकेट खेलाडीको केन्द्रीय सम्झौता सार्वजनिक गरेको हो । जसमा राष्टिय टीमका नियमित खेलाडीलाई ए, बी र सी गरि वर्गीकरण गरेको थियो ।

क्यानका कोषाध्यक्ष रोशन सिंहको नेतृत्वमा खेलाडी वर्गीकरण समिति बनाएर खेलाडीलाई वर्गीकरणका लागि सिफरिस गरेको थियो । अब राष्ट्रिय टोलीका कप्तान, प्रशिक्षकसहितका व्यक्तिहरुसँगको छलफलमा नयाँ वर्गीकरण प्रस्ताव ल्याउन समितिलाई निर्देशन दिइएको छ ।

जसमा राष्टिय टोलीका खेलाडीहरु सम्झौताबाट छुटेको भन्दै खेलाडीहरुले क्यानलाई पत्र लेखेपछि क्यान आफ्नो निर्णय पुनर्विचार गर्न तयार भएको हो ।

क्यानले खेलाडीको तलबसमेत बृद्धी गरेको थियो । जसमा पुरुष टोलीका ए, बी र सी श्रेणीका खेलाडीलाई क्रमशः ५० हजार, ४० हजार र ३० हजार तोकेको थियो । यस्तै, महिला खेलाडीलाई १५ हजार, १२ हजार र १० हजार दिने निर्णय गरेको थियो । क्यानले महिला टोलीको पहिलो पटक केन्द्रीय सम्झौता गरेको हो ।