काठमाडौं- कोरोना रोकथाम तथा नियन्त्रणमा सरकारले प्रभावकारी काम गर्न नसकेको भन्दै बालुवाटारमा प्रदर्शनमा उत्रिएका १२ जनालाई प्रहरीले नियन्त्रणमा लिएको छ ।

आज दिउँसो प्रदर्शनमा उत्रिएका ‘इनफ इज इनफ’का अभियन्ता १२ जनालाई प्रहरीले नियन्त्रणमा लिएको हो ।

प्रधानमन्‍त्री निवास बालुवाटारमा शान्तिपूर्ण आन्दोलनमा सहभागी १२ जनालाई प्रहरीले धरपकड गरी नियन्‍त्रणमा लिएको उनीहरुले बताएका छन् । निषेधित क्षेत्र प्रवेश गरेपछि पक्राउ गरिएको प्रहरीले जनाएको छ ।

ललितपुरको पाटनमा ६ दिनदेखि अनशनरत युवाहरुको समर्थनमा उनीहरुले बालुवाटारमा प्रदर्शनमा निकालेका हुन् ।

क्वारेन्टिन व्यवस्थित बनाउनुपर्ने, पीसीआर परीक्षणको दायरा बढाइनुपर्ने, क्रारेन्टिनमा महिलाको सुरक्षा हुनुपर्ने लगायतका मागसहित उनीहरु आन्दोलित भएका छन् ।