काठमाडौँ- बुधबार बिहान प्रहरी महानिरीक्षक ठाकुर ज्ञवालीको प्रमुख आतिथ्यमा महानगरीय प्रहरी परिसर ललितपुरको भवन उद्घाटन समारोह कार्यक्रम चलिरहेको थियो ।

जुन कार्यक्रममा प्रहरी महानिरीक्षकसँगै अतिरिक्त प्रहरी महानिरीक्षक (एआईजी)हरू विशेष अतिथि, त्यस्तै प्रहरी नायव महानिरीक्ष (डीआईजी)हरू र बरिष्ठ प्रहरी उपरीक्षक (एसएसपी)हरूलाई अतिथिको रुपमा बोलाइएको थियो ।

कार्यक्रममा भावी आइजीपिका प्रतिस्पर्धी एआईजी शैलेश थापा क्षेत्री र हरिबहादुर पाल एउटै गाडीमा पुगेका थिए । यतिमात्र होइन कार्यक्रम अवधिभर उनीहरू एउटै सोफामा बसेर एकआपसमा खुशीसाथ कुराकानी गरिरहे ।

अहिलेका प्रहरी महानिरीक्षक ठाकुर ज्ञवालीको अनिवार्य अवकास सँगै आगामी असार २५ गते एआईजी शैलेश थापा र हरि पालमध्ये एकजना प्रहरी महानिरीक्षक नियुक्त हुनेछन् ।

प्रहरी अधिकारीहरूका अनुसार, अहिले थापा र पाल दुबैबीच विगतका प्रतिस्पर्धी जस्तो अस्वथ्य लडाइँ देखिएको छैन । दुवैले एक–अर्कालाई स्वीकार्ने अवस्था छ।

विगतका दिनमा प्रहरीको नेतृत्व सम्हाल्न एकअर्काबीच कडा प्रतिस्पर्धा हुने गरेको थियो । आफ्नो–आफ्नो गुट बनाएर ठूलै प्रचारबाजी हुने गरेको थियो । तर अहिले त्यस्तो देखिएको छैन ।

नयाँ आइजीपीका दाबेदार शैलेश थापा क्षेत्रीले खबरहबसँग कुरा गर्दै एकअर्कामा जो नेतृत्वमा आए पनि सहज रुपमा स्वीकार्ने बताएका छन्।

उनले भने, ‘प्रहरी महानिरीक्षक नियुक्तीको काम सरकारको सरकारले जसलाई नियुक्ति गर्छ । हामी सहज रुपमा स्वीकार्छौं र आपसमा मिलेर काम गर्छौं।’

थापा र पाल दुवैजना २०४९ सालमा प्रहरी निरीक्षक (इन्स्पेक्टर) बाट प्रहरी सेवामा प्रवेश गरेका हुन् । अहिले थापाले नेपाल प्रहरीको मानव स्रोत एवं प्रशासन विभाग र पालले कार्य एवं अपराध अनुसन्धान विभाग सम्हालेका छन् । प्रहरीको अहिलेसम्मको रेकर्डमा थापा र पाल दुबैजना ठूलो विवादमा तानिएका छैनन् ।

यो पनि पढ्नुहोस्

को बन्ला नयाँ प्रहरी महानिरीक्षक !