काठमाडौं– सरकारले कोरोना संक्रमणको लक्षण नभएका तथा बिरामी नभएका कोरोना संक्रमितलाई अस्पताल भर्ना नगर्ने भएको छ ।

स्वास्थ्य मन्त्रालयका प्रवक्ता डा विकास देवकोटाले नियमित लाइभ अपडेट मार्फत लक्षण नदेखिएका कोरोना संक्रमितलाई अस्पतालमा भर्ना नगर्ने बताएका हुन् ।

डा देवकोटका अनुसार अबदेखि कोरोना संक्रमितहरुलाई लक्षण भएको र नभएको आधारमा छुट्टाइने छ । कोरोनाको लक्षण देखिएका संक्रमितलाई मात्र अस्पतालमा भर्ना गरिने डा देवकोटाले बताए ।

कोरोना संक्रमितको संख्या बढ्दै गएकाले स्वास्थ्य मन्त्रालयले लक्षण देखिएका संक्रमितलाई मात्र अस्पताल भर्ना गर्ने तयारी गरेको हो ।

‘संक्रमितहरुको संख्या बढेसँगै अब हामीले संक्रमित र बिरामी भनेर छुट्याउनुपर्ने हुन्छ,’ प्रवक्ता डा देवकोटाले भने, ‘संक्रमितहरु जो लक्षण छैन, उनीहरुलाई अस्पतालमा नराख्ने र लक्षण देखिएका बिरामी भएका संक्रमितलाई मात्र अस्पतालमा राखिनेछ ।’

उनले संक्रमितको संख्या बढ्दै जाँदा लक्षण नदेखिएका संक्रमितहरु घरमै क्वारेन्टाइनमा बस्नुपर्ने अवस्था समेत आउन सक्ने बताए ।

डा देवकोटाले मापदण्ड पुगेका क्वारेन्टाइनलाई नै आइसोलेसनमा विकास गर्ने तयारी पनि भइरहेको जानकारी दिए ।