ललितपुर- ललितपुर महानगरपालिकाले विदेशबाट फर्किने वडा बासीहरुलाई राख्नका लागि प्रत्येक वडामा होल्डिङ सेन्टर  खोल्ने भएको छ ।

विदेशबाट नेपाल फर्कनेहरु कोरोना भाइरसबाट संक्रमित हुनसक्ने तर्फ सावधानी अपनाउँदै महानगरले होल्डिङ सेन्टर खोल्न लागेको हो ।

कोरोना भाइरसको संक्रमण फैलन सक्ने खतरालाई मध्यनजर गर्दै सरकारले असार दोस्रो सातापछि मात्रै अन्तर्राष्ट्रिय उडान खोल्ने बताएको छ ।

ललितपुर महानगरपालिका प्रमुख चिरीबाबु महर्जनले महानगरको प्रत्येक वडामा खोलिने यस्ता सेन्टरमा विदेशबाट फर्किएकाहरुलाई राखिने बताए । उक्त सेन्टरमा विदेशबाट आउनेहरु सिधैं उक्त सेन्टरमा तोकिएको अवधि बसेर आवश्यक परीक्षणहरु सकेपछि मात्रै घर जान पाउने छन् ।

सामाजिक विकास समितिका संयोजक तथा महानगर वडा नं २४ का अध्यक्ष दिनेश कार्कीले वडाहरुमा होल्डिङ सेन्टर राख्नका लागि त्यस्ता ठाउँहरुको पहिचान भइरहेको बताए ।

उनका अनुसार ती होल्डिङ सेन्टर सामुदायिक भवन, पाटी प्यालेस लगायतका ठाउँमा संचालन गरिनेछ । सामुदायिक भवन र पाटी प्यालेस नभएको ठाउँमा मात्रै विद्यालयलाई प्रयोग गरिने संयोजक कार्कीले जानकारी दिए ।