लण्डन- विश्वव्यापी महामारीको रुपमा फैलिएको कोरोना भाइरसको संक्रमणका कारण बेलायतमा एक १३ वर्षीय बालकको मृत्यु भएको छ ।

दक्षिणी लण्डनको ब्रिक्सटनका १३ वर्षे इस्माइल मोहमम्द अब्दुल्वाहबको कोरोना भाइरसका कारण मृत्यु भएको लण्डन हस्पिटल ट्रस्टले पुष्टि गरेको हो ।

कोरोना भाइरसको संक्रमणका कारण बेलायतमा मृत्यु हुनेमध्ये उनी सबैभन्दा कम उमेरका व्यक्ति रहेको बताइएको छ ।

बेलायतमा बुधबार विहानसम्म कोरोना भाइरसका कारण १ हजार ७ सय ८९ जनाको मृत्यु भएको छ । संक्रमितको संख्या बेलायतमा २५ हजार १५० पुगेको छ ।

मृत्यु भएका बालकको परिवारले उनमा कुनै पनि गम्भीर स्वास्थ्य समस्या नरहेको बताएका छन् । बालकमा कोरोना भाइरसको संक्रमण रहेको पुष्टि गएको शुक्रबार भएको थियो ।