वीरेन्द्रनगर– कर्णाली प्रदेशको राजधानी सुर्खेतको वीरेन्द्रनगर नगरपालिका–११ पिपिराचोकमा ‘बम’ फेला परेको छ ।

पिपिराचोकमा रहेको एनसेल टावर नजिकै बमजस्तो देखिने शंकास्पद बस्तु फेला परेको जिल्ला प्रहरी कार्यालय सुर्खेतका प्रमुख प्रहरी उपरीक्षक (एसपी) दिल्लीराज पन्तले जानकारी दिए ।

एसपी पन्तले एनसेल टावरलाई लक्षित गरिएर राखिएको उक्त शंकास्पद बस्तु नक्कली बम भएको बताए ।

‘स्थानीयलाई तर्साउनका लागि बमजस्तो देखिने गरी शंकास्पद बस्तु राखिएको जस्तो देखिन्छ,’ एसपी पन्तले खबरहबसँग भने, ‘तर, त्यो नक्कली बम भएको पत्ता लागेको छ ।’

यद्यपि, उक्त शंकास्पद बस्तुको डिस्पोजका लागि नेपाली सेनाको टोली घटनास्थलमा पुगेको एसपी पन्तले जानकारी दिए ।