बैंगलुरु– भारतीय राज्य कर्नाटकको बैंगलुरुमा ५ जना नेपाली पक्राउ परेका छन् ।

एउटा ग्याङ बनाएर सन् २००७ देखि चोरीमा संलग्न रहेको अभियोगमा प्रहरीले ५ जना नेपालीलाई पक्राउ गरेको हो ।

पक्राउ पर्नेमा ३० वर्षीय मंगल सिंह, मनोज बहादुर, सुदीप धामी, विशाल र विनोद कुमार छन् ।

ह्याइटफिल्ड डिभिजन पुलिस कार्यालय बैंगलुरुले शहरमा भएका ५ वटा चोरीका घटनाको अनुसन्धान गर्ने क्रममा ५ जना नेपालीहरु पक्राउ परेका हुन् ।

प्रहरीले पक्राउ परेका ५ जना नेपालीहरुको साथबाट ७.५ किलो चाँदी र केही विद्युतीय उपकरण बरामद गरिएको जनाएको छ । बरामद भएको सामग्रीको मूल्य करिब ४ लाख ५० हजार भारतीय रुपैयाँ हुन आउँछ ।

पक्राउ परेकाहरु नेपालको बझाङ जिल्लाका रहेका जनाइएको छ । उनीहरु लामो बिदाको सिजनमा चोरी गर्ने मौका छोपेर नेपालबाट बैंगलुरु पुग्ने गरेको प्रहरीको दावी छ ।

लामो बिदाको समयमा शहरका मानिसहरु गाउँ तथा छुट्टीमा जाँदा उनीहरुले घरमा पसेर चोरी गर्ने गरेको स्थानीय प्रहरीको भनाइ छ ।

उनीहरुले हालैको दशहरा (दशैं) बिदाको समयमा बन्द रहेका घरहरुले टार्गेटमा राखेका थिए ।

स्थानीय प्रहरी अधिकारीले उनीहरु एउटा घरको ताला तोड्दै गरेको अवस्थामा फक्राउ परेका जनाएका छन् ।