काठमाडौं-बन्दको आह्वान गरेको नेत्रविक्रम चन्द विप्लवका कार्यकर्ताले बन्दको अवज्ञा गरेर गुडाएका सवारीमा क्षति पुर्‍याएका छन् भने विभिन्न ठाउँमा शंकास्पद वस्तु फेला परेको छ ।

नुवाकोट : नुवाकोटको ककनी गाउँपालिका वडा नं १ को वडा कार्यालयमा गएराति बम विस्फोट भएको छ । विष्फोटबाट कार्यालयमा रहेका कागजपत्र, कम्युटर लगायत महत्त्वपूर्ण सबै सामाग्री जलेर क्षति भएको छ ।

मकवानपुर : त्यस्तै बन्दको अवज्ञा गरेको भन्दै विप्लव समूहका कार्यकर्ताले मकवानपुरमा गाडीमा आगजनी गरेका छन् । हेटौंडा–नारायणगढ खण्डअन्तर्गत मनहरी–९, ज्यामिरेमा बा ५ ख १७३९ नम्बरको ट्रक र मकवानपुरकै फाखेल–हुमाने भञ्ज्याङ्ग सडक खण्डमा बा १४ च ८२३४ नम्बरको कारमा आगजनी गरिएको हो ।

आगजनीका कारण कार पूर्ण रूपमा क्षति पुगेको र ट्रकको अगाडिको भाग मात्र जलेको जिल्ला प्रहरी कार्यालय, मकवानपुरका प्रहरी उपरीक्षक मुकेश सिंहले जानकारी दिए ।

त्यसैगरी हेटौंडाका विभिन्न स्थानमा शंकास्पद वस्तु पनि फेला परेका छन् । हेटौंडाका थानाभर्याङ, चौकीटोल, हुप्राचौरको क्विक २० नजिकै शंकास्पद् वस्तु सेनाको टोलीले निष्क्रिय पारेको छ । हेटौंडाको मुख्य बजारको पारिजात पथमा फेला परेको शंकास्पद वस्तु निष्क्रिय पार्न सेनाको टोली आउँदै गरेको प्रहरीले जनाएको छ ।

विप्लव समूहले उपत्यका इन्जार्ज माइला लामा पक्राउको विरोधमा आज बन्द आह्वान गरेको छ ।