काबुल– अफगानिस्तानको राजधानी काबुलमा भएको बम आक्रमणमा कम्तीमा ४ जनाको मृत्यु भएको छ ।

पूर्वी काबुलको जलालावाद सडकमा भएको आत्मघाती बम आक्रमणमा ४ जनाको मृत्यु भएको तथा अन्य ३ जना घाइते भएको स्थानीय अधिकारीहरुले जनाएका छन् । अन्तर्राष्ट्रिय सञ्चारमाध्यमले जनाएअनुसार विदेशीलाई लक्षित गरी बम आक्रमण गराइएको हो ।

हताहती हुनेमध्ये अधिकांश विदेशी रहेको हुनसक्ने आशंका गरिएको छ । आक्रमणको जिम्मा हालसम्म कुनै पनि समूहले लिएको छैन ।

यसअघि बिहीबार मात्रै काबुलस्थित सैनिक तालिम केन्द्रमा गराइएको बम आक्रमणमा ६ जनाको ज्यान गएको थियो । बिहीबार भएको बम आक्रमणको जिम्मा भने आतंकवादी संगठन इस्लामिक स्टेटले लिएको थियो ।

पछिल्लो समय अफगानिस्तान सरकारले आसन्न ईद पर्वलाई मध्यनजर गर्दै राजधानी काबुलमा उच्च सुरक्षा सतर्कता अपनाएका बेला शहरमा लगातार २ दिन बम विष्फोट गराइएको छ ।