भारत- भारतको राजस्थानमा भारतीय वायुसेनाको लडाकु विमान दुर्घटनामा परेको छ । राजस्थानको राजधानी जोधपुरबाट १ सय २० किलोमिटर दक्षिणमा रहेको सिरोही जिल्लामा भारतीय वायुसेनाको रुसमा निर्मित मिकोयान मिग २७ लडाकु विमान दुर्घटनामा परेको भारतीय अधिकारीले जनाएका छन् ।

विमानका चालक भने सुरक्षित रुपमा विमानबाट जमिनमा अवतरण गर्न सफल भएको बताइएको छ नियमित उडानका क्रममा रहेको लडाकु विमान दुर्घटनामा परेको भारतीय सञ्चारमाध्यमले जनाएका छन् ।

प्रारम्भिक जानकारी अनुसार विमान दुर्घटना भएको स्थानमा जनधनको कुनै क्षति भएको छैन । इन्जिनमा खराबी आएपछि विमान दुर्घटनामा परेको आशंका गरिएपनि त्यसको पुष्टि भइसकेको छैन । दुर्घटनाग्रस्त लडाकु विमान राजस्थानको उत्तरलाई विमानस्थलबाट उडेको थियो । प्रहरीले त्यस दुर्घटना भएको स्थानलाई सिल गरेर अनुसन्धान गरिरहेको जनाएको छ ।

राजस्थानकै बिकानेरमा मिग २१ लडाकु विमान दुर्घटनामा परेको तीन सातापछि पछिल्लो दुर्घटना भएको हो । पछिल्ला केही समययता भारतीय वायुसेनाले ठूलो परिमाणमा सैनिक विमान र हेलिकोप्टर गुमाउँदै आएको छ ।

सन् २०१८ यता मात्र भारतीय वायुसेनाले १७ वटा सैनिक हेलिकोप्टर र विमान गुमाइसकेको छ भने गत फेब्रुअरी महिनामा मात्र भारतले ९ वटा सैनिक विमान र हेलिकोप्टर गुमाएको थियो ।