न्यूयोर्क– अमेरिकाले मध्य अमेरिकी महादेशका तीन मुलुकहरुलाई दिँदै आएको आर्थिक सहायता बन्द गरिदिएको छ ।

मध्य अमेरिकाका तीन मुलुकहरु होण्डुरस, निकारागुवा र एल साल्भाडोरले अमेरिकातर्फ आप्रवासीलाई पठाइरहेको भन्दै ती मुलुकहरुलाई दिइँदै आएको आर्थिक सहायता बन्द गरिएको हो ।

अमेरिकाको विदेश मन्त्रालयले विज्ञप्ती जारी गर्दै अमेरिकी राष्ट्रपति डोनाल्ड ट्रम्पको निर्देशन अनुसार ‘नर्दन ट्रायाङ्गल’ भनिने ती मुलुकलाई उपलब्ध गराइँदै आएको ७० करोड अमेरिकी डलरभन्दा धेरैको आर्थिक सहायता बन्द गरिएको जनाएको हो ।

यद्यपि, विदेशमन्त्रालयको घोषणालाई कङ्ग्रेसले पनि स्वीकृत गर्नुपर्ने बताइएको छ । त्यसका लागि विदेशमन्त्रालयले कङ्ग्रेससँग पनि सहकार्य गर्ने जनाएको छ ।

पछिल्ला केही दिनयता मेक्सिकोसँगको दक्षिणी सीमा भएर अमेरिका प्रवेश गर्न चाहने आप्रवासीको सङ्ख्या बढ्दै गएपछि अमेरिकाले आर्थिक सहायता बन्द गरेको हो ।

यसअघि राष्ट्रपति ट्रम्पले यसै साता मेक्सिकोसँगको सीमा पनि बन्द गर्ने सम्भावना रहेको चेतावनी दिएका थिए । मध्य अमेरिकी मुलुकहरुले आप्रवासीको लस्कर तयार पारेर अमेरिकातर्फ पठाउने गरेको आरोप लगाउँदै आएका छन् ।