काठमाडौं–राजपाका अध्यक्षमण्डलका सदस्य राजेन्द्र महतो दुई तिहाइको वर्तमान सरकारले सञ्चारक्षेत्रलाई नियन्त्रण र हस्तक्षप गर्न खोजेको आरोप लगाएका छन् ।

आइतबार रिपोर्टर्स क्लवको वार्षिक उत्सवमा बोल्दै नेता महतोले सरकारको दम्भले मिडिया नियन्त्रण गर्न खोजेको र यो निकै दुखद् भएको बताए ।

लोकतान्त्रिक व्यवस्थाका कारण यो सरकार बनेको भन्दै उनले यसलाई जोगाउन जरुरी भएको बताए । ‘सत्ताको दम्भमा जब सत्ताले हरेक क्षेत्रमा नियन्त्रणको प्रयास गर्छ त्यो सरकार टिकेको छैन’ उनले भने ।

सरकारले आफ्नो असफलता लुकाउन मिडियालाई नियन्त्रण गर्ने काम दुर्भाग्य पूर्ण भएको महतोको भनाइ थियो । सरकारले असफलता लुकाउनका लागि मिडियामाथि अंकुश लगाउनु भन्दा राम्रो काम गरेर अघि बढ्नुपर्ने उनको भनाइ थियो ।

जनताले दुई तिहाइ मत आफ्ना आकांक्षा पूरा गर्न दिएको भन्दै नेता महतोले जनताको आकांक्षालाई पूर्ण गर्ने दायित्व सरकारको भएको बताए ।

‘राजा ज्ञानेन्द्रले दम्भ देखाएका कारण नारायणहिटी बाट सरेर कहाँ पुगे ’ महतोले प्रश्न गर्दै भने,‘त्यसैले राज्यले दम्भ देखायो भने जनताले सजाय दिन्छ ।’