धनगढी– कैलालीको धनगढीमा २ किलो ४ सय ग्राम सुनजस्तो देखिने पहेँलो धातुसहित १ जना पक्राउ परेका छन् ।

धनगढी बसपार्कबाट १ जनालाई २ किलो सुनजस्तो देखिने पहेँलो धातुसहित पक्राउ गरिएको जिल्ला प्रहरी कार्यालय कैलालीका प्रहरी निरीक्षक प्रकाश ठाकुरले जानकारी दिए ।

प्रारम्भिक परीक्षणका क्रममा बरामद भएको बस्तु नक्कली सुन भएको भेटिएको इन्सपेक्टर ठाकुरको भनाइ छ ।

‘बरामद भएको बस्तु सुनजस्तो देखिन्छ । तर, सक्कली हो कि हैन भनेर सुन चाँदी व्यवसायीकहाँ लगेर प्रारम्भिम परीक्षण गरेका छौं,’ ठाकुरले खबरहबसँग भने, ‘प्रारम्भिक परीक्षणका क्रममा उक्त बस्तु सुन नभएको देखिएको छ । यद्यपि, विस्तृत परीक्षणका लागि ल्याब पठाएको छौं । ल्याब रिपोर्ट आएपछि मात्रै थप भन्न मिल्छ ।’

प्रहरीले सुनजस्तो देखिने बस्तुसहित १ जना पक्राउ गरेको जनाए पनि नाम भने सार्वजनिक गरेको छैन ।

उक्त प्रकरणमा अन्य व्यक्ति पनि संलग्न भएको देखिएका कारण अन्य व्यक्तिको खोजीमा असर पुग्ने भन्दै प्रहरीले पक्राउ परेका व्यक्तिको नाम सार्वजनिक गर्न नमिल्ने जनाएको छ ।