गौर– नेपाल कम्युनिष्ट पार्टी प्रदेश नम्बर २ का अध्यक्ष तथा सांसद प्रभु साहले कांग्रेसका कारण मधेश बदनाम भएको र पछाडि रहेको आरोप लगाएका छन् ।

दशै, दिपावली तथा छठ पर्वको अवसरमा रौतहटको बौधीमाई नगरपालिका-८, सरमुजवामा नेकपा नगर कमिटीद्वारा आयोजित शुभकामना आदानप्रदान तथा अन्तरक्रिया कार्यक्रममा अध्यक्ष साहले लामो समयसम्म मधेशमा शासन गरेको कांग्रेसका लागि मधेस सत्ता प्राप्तिका लागि भोट बैंक मात्र भएको आरोप लगाए ।

अध्यक्ष साहले भने, “हिजो मधेशमा एकल प्रभुत्व कायम गरेको नेपाली कांग्रेस लामो समय देशमा शासन गरे तर मधेशका लागि केही पनि गरेन । जसका कारण विगतमा विकसित तराई-मधेश आज उजाड छ । मानव विकास सूचकांकमा पछाडि छ । उद्योग, व्यापार, कृषिजस्ता सम्भावना नै सम्भावना रहेको तराई मधेश कांग्रेसको भोट बैंक मात्र रहयो ।”

मधेशको नाममा आफू बारम्बार सत्तामा पुगेको कांग्रेसले प्रदेशलाई धारासाही बनाउने काम मात्र नगरेको बरु मधेशी दलका नेतालाई पनि भ्रष्टाचार गर्न सिकाएको अध्यक्ष साहको भनाइ छ ।

उनले भने, “विगत देखि चल्दै आएको मधेशको व्यापार बढ्नुको सट्टा ह्रास हुँदौ गयो र उद्योग धन्दा पनि धरासाही हुने क्रम शुरु भयो तथा कृषिमा खासै प्रगति भएन । हुलाकी सडकजस्ता सडक समेत बनेन । मधेशमा एउटा मात्र भयो त्यो हो कांग्रेसको संगतले मधेशीहरुले भ्रष्टाचार गर्न सिक्यो । जसले गर्दा आज मधेश बदनाम छ ।हामी भन्न हिच्किचाउनुहुँदैन कि कांग्रेसले गर्दा हिजो देशमा ८० प्रतिशत आर्थिक योगदान गर्ने मधेश आज पछाडि छ ।”