भक्तपुर- दशैँका लागि मुस्ताङबाट ल्याइएका च्याङ्ग्राको मूल्य यसवर्ष बढेको छ । खसीको मासुको मूल्य वृद्धि भएसँगै च्याङ्ग्राको मासुको पनि मूल्य वृद्धि भएको हो ।

यस वर्ष जिउँदो च्याङ्ग्रा प्रतिकिलो रु ७८० मा मूल्य निर्धारण गरेर बिक्री शुरु गरेको व्यापारी सनम लामाले बताए ।

हिमाली भेगबाट आयात हुने भेडा र च्याङ्ग्रा जडीबुटी खाएर हुर्कने तथा यसको मासु स्वस्थकर हुने विश्वासले उपभोक्ताले च्याङ्ग्राको मासु रोज्न थालेपछि मूल्य वृद्धि भएको हो ।

मासुका लागि प्रयोग गर्न भारतबाट उच्चरुपमा खसीबोका आयात हुने गरे पनि यस वर्ष खसीमा स्वास्थ्य परीक्षण गरेर मात्रै आयात गर्नुपर्ने भएपछि खसीबोका आयात घटेको छ ।

खसीबोकाको आयात घटेसँगै यस वर्षको दशैँमा खसीबोकासँगै च्याङ्ग्राको मूल्य पनि वृद्धि भएको व्यापारी बताउँछन् ।

विगत १८ वर्षदेखि भेडा र च्याङ्ग्रा व्यापार गर्दै आएका व्यापारी पशुपति सिलवालले प्रदेशदेखि स्थानीय तहसम्मका सरकारलाई कर बुझाउन परेकाले पनि मूल्यमा वृद्धि भएको बताए ।

मुस्ताङबाट म्यादी, पर्वत, कास्की, तनहुँ, चितवन, धादिङ, काठमाडौँ हुँदै भक्तपुरको सल्लाघारीसम्म भेडा र च्याङ्ग्रा ल्याउँदा आधा दर्जनभन्दा धेरै स्थानमा कर तिर्नु परेको व्यापारीको भनाइ छ ।

केन्द्रीय सरकारले खसीबोका र भेडा, च्याङ्ग्रामा कर नलिन आग्रह गरे पनि स्थानीय सरकारले अटरे गरेपछि त्यसको प्रत्यक्ष मारमा भने आम सर्वसाधारण पर्ने भएका छन् ।

सल्लाघारीमा मङ्गलबार र बुधबार पनि व्यापारीले भेडा, च्याङ्ग्रा ल्याउँदै छन् । भक्तपुरमा मात्रै यस वर्ष २००० दुई हजार बढी भेडा, च्याङ्ग्रा ल्याइने व्यापारीले जनाएका छन् ।