सिन्धुपाल्चोक– नेपाली कांग्रेसका नेता मोहनबहादुर बस्नेतले आफूलाई एक कार्यक्रममा प्रमुख अतिथि नबनाएको निहुँमा कार्यक्रम नै भाड्न खोजेको जिल्ला नेताहरुले आरोप लगाएका छन् ।

नेपाल महिला संघले आयोजना गरेको मंगलादेवी स्मृति दिवसको कार्यक्रममा नेता बस्नेतलाई प्रमुख अतिथि नबनाएपछि उनले कार्यक्रम नै भाड्न खोजेको आरोप लगाइएको हो ।

गत मंगलबार मंगलादेवी सिंहको २३ औँ स्मृति दिवस मनाइयो ।  महिला संघ जिल्ला शाखाले बाह्रबिसेमा ‘कांग्रेसमा महिलाको अवस्था र पहुँच’ विषयक कार्यक्रम आयोजना गरेको थियो ।

महिला संघको कार्यक्रममा प्रमुख अतिथिका रुपमा महिला नै बनाइएको र नेता बस्नेतलाई विशेष अतिथिका रुपमा निम्त्याइएको भए पनि उनी विशेष अतिथिको रुपमा उपस्थित भएनन् ।

सोही दिन उनले आक्रोश मात्र पोखेनन् लामोसाँघुमा जनजागरण कार्यक्रम नै आयोजना गर्न क्षेत्रीय समितिलाई निर्देशन समेत दिएर उक्त कार्यक्रमको प्रमुख अतिथि समेत बने ।

कांग्रेसका एक जिल्ला नेताले भने, ‘महिला संघको कार्यक्रम भाँड्नको लागि नेता बस्नेतले कार्यक्रम गरेका थिए तर, उनले सोचेजस्तो भएन जागरुण कार्यक्रममा भन्दा महिला संघको कार्यक्रममा उत्साहजनक सहभागिता थियो ।’

महिला संघ जिल्ला सदस्य पाल्साङ लामाले आफूलाई नेता बस्नेतले महिला संघको कार्यक्रममा नजान धम्कीसमेत दिएको आरोप लगाएकी छिन् ।