काठमाडौं–दक्षिण कोरिया भ्रमणमा रहेका अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ उनबीच आज (आइतबार) भेटवार्ता हुने भएको छ ।

ट्रम्पले पटक पटक गरेको आग्रहलाई स्वीकार गर्दै किम दुई कोरियाको सीमा क्षेत्रमा ट्रम्पसँग भेट्न राजी भएका हुन् ।

अमेरिकी राष्ट्रपति ट्रम्प र उत्तर कोरियाली नेता किमबीच भेटवार्ता हुने पक्का भएको दक्षिण कोरियाका राष्ट्रपति मोन जेइइनले बताएका छन् ।

यसअघि ट्रम्पको भेटवार्ताको प्रस्ताव सकारात्मक भएको बताएका किमले औपचारिक रुपमा भेट गर्ने भन्ने संकेत गरेका थिएनन् ।

ट्रम्पको सीमा क्षेत्र भ्रमणमा जाने आजको कार्यतालिका अनुसार नै दुई नेताबीचको भेटवार्ता हुने तय भएको हो ।

भेटबारेको धारणा सार्वजनिक गर्दै ट्रम्पले ‘उनीहरुले भेट्न इच्छुक रहेको’ प्रतिक्रिया दिएका छन् । वार्ता छोटो भएपनि एउटा ‘ह्याण्डसेक’को महत्व धेरै भएको उनको बताए।

यसअघि उनले उत्तर कोरियामा आफ्नो पाइला राख्नु कुनै समस्या नहुने बताएका थिए।