हुम्ला– हिमाली जिल्ला हुम्लाको दुर्गम क्षेत्रमा उपचारका लागि खटिएकी अनमी नै बिरामी भएर थला परेकी छन् । जिल्लाको चंखेली गाउँपालिका वडा नं ६ स्थित मेल्छाम स्वास्थ्य चौकीमा कार्यरत अनमी निशा नेपाली सोमबार राति २ बजेदेखि उच्च रक्तस्रावले थला परेकी हुन् ।

दाङ, घोराही उपमहानगरपालिका १५ स्थायी घर भएकी ३५ वर्षीय अनमी नेपाली अत्यधिक रक्तस्रावले थला परेकाले उद्धारका लागि गृह मन्त्रालयमा हेलिकप्टरका लागि पहल भइरहेको प्रमुख जिल्ला अधिकारी धोलकराज ढकालले जानकारी दिए ।

३ महिना पहिले गर्भ खसेपछि औषधि गरेर आएकी नेपाली रातिदेखि बिरामी भएर स्वास्थ्यचौकीमा छट्पटाइरहेको मेल्छाम स्वास्थ्यचौकीकी अनमी बेलसरा बुढाले जानकारी दिए ।

अनमी नेपाली रातिदेखि छट्पटाइरहेको खबर पाउनासाथ उद्धारका लागि पहल गरिएको ढकालले जानकारी दिए ।

नेपालीको उद्दारका लागि सेनाको हेलिकप्टर काठमाडौँबाट आउने तयारी भइरहेको जिल्ला अस्पतालका सिनियर अनमी सरिता बोहराले बताइन् । बिरामी नेपालीलाई हेलिकप्टरमार्फत प्रदेश अस्पताल सुर्खेतमा लगिने जनाइएको छ ।