डच फुटबल टोली आयाक्स इङ्गलिस क्लब टोटनह्याम हट्सपुरविरुद्ध च्याम्पियन्स लिग सेमिफाइनलको पहिलो लेगमा मैदान उत्रिदैछ । टोटनह्यामको घरेलु मैदानमा डच टोली आफ्नो प्रभाव जमाउने लक्ष्यमा रहनेछ भने आफ्ना समर्थकका अगाडि टोटनह्याम आफूलाई बलियो सावित गर्न खोज्नेछ ।

त्यसोत टोटनह्यामका प्रशिक्षक माउरिसियो पोचेटिन्होले आफ्नो ‘सपना जीवित’ रहेको बताए छन् । टोटनह्यामविरुद्ध खेल्न लागेको आयाक्सले च्याम्पियन्स लिगको सफल क्लब रियल र इटालीयन जाइन्ट युभेन्टस्को यात्रामा बिराम लगाइसकेको छ ।

सन् १९६२ पछि पहिलो पटक सेमिफाइनल खेल्न लागेको टोटनह्याम इतिहास रच्ने लक्ष्यमा रहेको छ । ‘तपाईंले सपनालाई पहिला स्थापित गर्नुपर्छ,’ प्रशिक्षक पोचेटिन्होले भने, ‘जहिले तपाईंले केही कुरा प्राप्त गर्नुहुन्छ त्यो नै तपाईंको सपना हो । त्यस्तै, टोटनह्यामका लागि च्याम्पियन्स लिग सेमिफाइनल एक सपना हो । जुन ५ वर्ष अघि देखिएको थियो र अहिले पूरा भएको छ ।’

क्वाटरफाइनलमा म्यान्चेस्टर सिटीलाई नाटकिय रुपमा पराजित गर्दै सेमिफाइनल यात्रा तय गरेको टोटनह्यामले आयाक्सलाई रोक्ने लक्ष्य बनाएको छ । ‘हाम्रो खेल एक गतिमा अगाडि बढिरहेको छ । जसमा हामी जस्तो सुकै सफलता पनि हासिल गर्न सक्छौं र सबैकुरा सम्भव छ । त्यो नै हाम्रो बलियो पक्ष हो,’ पोचेटिन्होले थपे, ‘हामीसँग राम्रो अवसर छ कि हामी सेमिफाइनल खेल्दैछौं । यसअघि यो भएको थिएन ।’

पोचेटिन्हो विपक्षी पनि बलियो टिम भएको बताएका छन् । उनले भने, ‘हामी विपक्षीको सम्मान गर्न चाहान्छौं । आयाक्स जुन अवस्थामा छ त्यो उनीहरुका लागि पनि लायक छ । यो खेल निकै प्रतिस्पर्धात्मक हुनेछ ।’

आयाक्सविरुद्ध टोटनह्यामका उच्च गोलकर्ता ह्यारि केन मैदान उत्रिने छैनन् । उनी एन्कल इन्जुरीका कारण आराममा छन् । यस्तै, फरवार्ड सन ह्युङ मिन पनि प्रतिबन्धमा छन् । टोटनह्यामका महत्वपूर्ण दुई खेलाडी बाहिर हुँदा आयाक्सलाई फाइदा पुग्न सक्ने फुटबल विश्लेषकहरुको भनाइ छ ।