लम्की– पूर्व–पश्चिम राजमार्गअन्तर्गत कैलालीको लम्कीमा ट्रकको ठक्करबाट एक किशोरीको मृत्यु भएपछि उक्त क्षेत्र तनावग्रस्त बनेको छ ।

ना ५ ख ९२३३ नम्बरको ट्रकको ठक्करबाट स्थानीय लम्की बहुमुखी क्याम्पसमा अध्ययनरत १९ वर्षीया सुनिता रावलको घटनास्थलमै मृत्यु भएको हो ।

ठक्कर दिने ट्रकका चालक फरार भएपछि स्थानीयहरु प्रदर्शनमा उत्रिएका हुन् । स्थानीयले ट्रकमा आगजनी गरेका छन् ।

स्थानीयको प्रदर्शन उग्र बन्दै गएपछि प्रहरीले नियन्त्रणको प्रयास थालेको छ ।

प्रदर्शन नियन्त्रणमा लिन इलाका प्रहरी टीकापुरका प्रमुख प्रहरी नायव उपरीक्षक शिव बहादुर सिंहको नेतृत्वमा प्रहरी परिचालन भएको छ ।

स्थानीयको प्रदर्शन नियन्त्रणमा लिन इलाका प्रहरी कार्यालय टीकापुर र लम्कीसहित सशस्त्र प्रहरीको टोली परिचालन भएको छ ।

आक्रोशित स्थानीयले प्रहरीमाथि समेत ढुङ्गा–मुडा प्रहार गरेका छन् । प्रहरीले स्थिति नियन्त्रणमा लिन करिब ११ राउण्ड अश्रु ग्यास प्रहार गरेको छ ।