पोखरा- प्रतिनिधिसभा, प्रदेशसभा तथा स्थानीय तहको उपनिर्वाचन अर्न्तगत गण्डकी प्रदेशका पाँच स्थानमा करिब २५ प्रतिशत मतदान भएको छ ।

बिहान साढे १० बजेसम्म करिब २५ प्रतिशत मतदान भएको निर्वाचन कार्यालयहरुले जनाएका छन् । ७१ हजार ८७१ मतदाता रहेको कास्की २ का ८२ वटै मतदान केन्द्रमा उत्साहपूर्वक मतदान भइरहेको र अहिलेसम्म २५ प्रतिशत बढी मतदान भइसकेको जिल्ला निर्वाचन अधिकृत महेन्द्र सुवेदीले जानकारी दिए ।

विहान केही ठाउँमा विस्फोट भएका कारण केही समय मतदान रोकिए पनि अहिले निरन्तर रुपमा मतदान भइरहेको सुवेदीले बताए ।

अधिकांश पोखराको मुख्य बजार क्षेत्र समेटिएको कास्की २ का सबै मतदान केन्द्रहरुमा मतदाताहरु लामबद्ध भएर मतदान गरिरहेका छन् ।

यस्तै, ३६ हजार ९२४ मतदाता रहेको बागलुङ २ (ख) मा पनि २५ प्रतिशत भन्दा बढी मतदान भइसकेको जिल्ला निर्वाचन अधिकृत विकासचन्द्र पौडेलले जानकारी दिए । बिहान सात बजेदेखिनै मतदाताहरु मतदानमा सहभागी भएको बताउँदै पौडेलले ४३ वटै मतदान केन्द्रमा शान्तिपूर्ण रुपमा मतदान भइरहेको छ ।

वडा अध्यक्षका लागि बागलुङको बडिगाढ गाउँपालिका वडा नं. २ मा भएको मतदानमा अहिलेसम्म २१ प्रतिशत मतदान भएको त्यहाँबाट कमल पौडेलले जानकारी दिए ।

एक हजार ७४२ मतदाता रहेको बडिगाढ गाउँपालिका वडा नं. २ मा अहिलेसम्म ३५७ मतदान भइसकेको छ । यस्तै लमजुङको सुन्दरबजार नगरपालिका वडा नं. २ मा ३० प्रतिशत मतदान भएको छ ।

मतदान शुरु भएपछि कास्कीका तीन र लमजुङको एक ठाउँमा विस्फोट भएको थियो । कास्कीको वडा नं. ९, वडा नं. १६ र वडा नं. ३३ मा विस्फोट भएको थियो । वडा नं. ९ को नवप्रभात माध्यामिक विद्यालयको मतदान केन्द्र नजिकै विस्फोट भएपनि अन्य दुई ठाउँमा मतदान केन्द्रभन्दा टाष विस्फोट भएको थियो ।

यस्तै लमजुङको सुन्दरबजार नगरपालिका वडा नं. २ को महेन्द्र मन्दिर मावि परेवाडाँडा मतदान केन्द्र नजिकै विस्फोट भएको थियो । विस्फोट भएपनि मतदान भने निरन्तर चलीरहेको निर्वाचन कार्यालयले जनाएको छ ।