काठमाडौं– नेपाल यात्राका लागि विश्वकै पुरानो क्रिकेट क्बल मानिएको इङ्ग्ल्याण्डको मेरीलेबोन क्रिकेट क्लब (एमसीसी)ले टीमको घोषणा गरेको छ ।

नेपाल भ्रमणका लागि जिम्मी एडम्सको कप्तानीमा १३ सदस्यीय टिमको घोषणा गरिएको हो ।

टोलीमा कप्तान एडम्ससँगै यासिर अरफात, बिली गोड्लीमन, मिल्स हम्मोड, ओलिभर हानोन डाल्बे, कलम ज्याक्सन, विल रोड्स, एलेक्स स्पेन्सेर, एलेक्स थोमस, विल भन्देरस्पेर, एड योङ, टम वेस्ट्ले र क्रिस राइट छन् ।

टीममा रहेकामध्ये यासिर अरफातले पाकिस्तानको राष्ट्रिय टिमबाट टेस्ट खेलिसकेका छन् भने विल रोड्सले इङ्ग्ल्याण्डको यू–१९ टिमबाट खेलिसकेका छन् ।

२ हप्ते नेपाल भ्रमणको क्रममा एमसीसीले नेपाली राष्ट्रिय टोली, यु–१९ टोली र पोखराका स्थानीय क्लबहरुसँग खेल्ने छ । एमसीसीले जम्मा ६ खेल खेल्ने जनाइएको छ । जसमध्येका ३ खेल राष्ट्रिय टोलीसँग हुने छन् ।

एमसीसीको टोली बुधबार नेपाल आइपुग्ने जनाइएको छ ।