बेलायतमा आगामी डिसेम्बर १२ मा आम चुनाव गर्ने प्रस्ताव त्यहाँको संसदले खारेज गरिदिएको छ ।

प्रधानमन्त्री बोरिस जोनसोनको जोडबलका बाबजुद संसदले आम चुनावको प्रस्ताव खारेज गरिदिएको हो ।

सरकारले आगामी डिसेम्बर १२ मा आम चुनाव गर्नेगरी संसदमा विधेयक दर्ता गरेको थियो । उक्त विधेयक पारित गर्नका लागि संसदमा रहेका कूल सदस्य संख्याको दुई तिहाईको समर्थन आवश्यक थियो । तर, सरकारले भने विधेयकको पक्षमा २ सय ९९ जना सांसदको मात्रै समर्थन जुटाउन सक्यो ।

यसका बाबाजुद प्रधानमन्त्री बोरिसले छिट्टै आम चुनाव सम्पन्न गर्नका लागि पुनः अर्को विधेयक ल्याउने जनाएका छन् । उक्त विधेयक साधारण बहुमतले पारित हुने गरी ल्याइने पनि प्रधानमन्त्री बोरिसको भनाइ छ ।

जोनसोनले भनेका छन्– ‘संसद निष्क्रिय भइसकेको छ । सांसदहरु यो देशलाई बन्धक बनाएर राख्न सक्दैनन् ।’

तर, विपक्षी लेबर पार्टीले प्रधानमन्त्रीमाथि विश्वास गर्न नसकिने जनाएको छ ।

यस बीच युरोपेली संघ (इयू)ले बेक्जिट प्रक्रियाका लागि बेलायतलाई आगामी जनवरी ३१ तारिख सम्मका लागि समय दिने निर्णय गरेको छ ।

यसअघि प्रधानमन्त्री जोनसोन ३१ अक्टोबरमै ब्रेक्जिट लागू गर्नका लागि अडानमा थिए । यद्यपि इयूको नयाँ प्रस्ताव उनले पनि स्वीकार गरिसकेका छन् ।

अक्टोबर महिनाको पहिलो हप्तामा प्रधानमन्त्री जोनसोनले इयूलाई बिना हस्ताक्षरको पत्र लेख्दै ब्रेक्जिट प्रक्रियाको ‘विलम्ब’का लागि अनुरोध गरेका थिए ।