यमन- यमनका हुथी विद्रोहीले सयौंको संख्यामा साउदी अरबका सैनिकलाई नियन्त्रणमा लिएको दावी गरेका छन् ।

हुथी विद्रोहीका प्रवक्ता कर्नल याहिया सारियाले साउदी अरबको नाजरान शहरबाट तीन जना सैनिक ब्रिगेडले आत्मसमर्पण गरेको दावी गरेका हुन् ।

तीन दिने कारवाही अभियानमा कयौं सैनिक मारिएको समेत उनीहरुले दावी गरेका छन् । हुथी विद्रोहीको दावीबारे साउदी अरेबियाका सरकारी अधिकारीहरुले भने कुनै प्रतिक्रिया दिएका छैनन् ।

हुथी विद्रोहीका प्रवक्ता सारियाले यमनमा जारी विद्रोहमा अहिलेसम्मकै ठूलो सफलता हात परेको दावी गरेका छन् ।

हुथी विद्रोहीले यसअघि पनि साउदी अरेबियाका दुई तेल प्रसोधन केन्द्रमा आक्रमण गरेको दावी गरेका थिए ।

यमनमा सन् २०१५ देखि जारी संघर्षमा हुथी विद्रोहीले राजधानी सनालाई कब्जामा लिएपछि राष्ट्रपति अब्दरबु मंसुर हादी देश छोडेर भागेका थिए ।