भारत– मुम्बई महान् रुसी लेखक लियो टोल्सटयको ‘वार एण्ड पिस’ उपन्यासलाई रुसी भाषाको मात्र नभइ विश्व साहित्यकै उत्कृष्ट कृतिका रुपमा लिइन्छ ।

नेपोलियन युद्धताका जारशाही रुसी समाजको परिवेश समेटिएको ‘वार एण्ड पिस’ लाई निकै महत्वपूर्ण कृति मानिन्छ । तर, यही उपन्यास अहिले भारतमा भने विवादको केन्द्र बन्न पुगेको छ ।

खासमा बम्बैको उच्च अदालतले एक अभियन्तालाई आफूसँग किन ‘यस्तो किताब’ राखेको भनेर प्रश्न गरेपछि भारतीय सामाजिक सञ्जालमा बहसको विषय बनेको छ ।

बुधबार बम्बैको उच्च अदालतले सामाजिक अभियन्ता भर्नन गोन्जाल्भेजलाई यो किताब आफूसँग राख्नुको कारणबारे जानकारी मागेको हो । जातीय भेदभावविरुद्ध अभियान चलाइरहेका गोन्जाल्भेजसहित ५ जनालाई प्रहरीले गत वर्ष पक्राउ गरेको थियो । प्रहरीले उनलाई पक्राउ गर्ने बेला वार एण्ड पिस सहितका केही पुस्तक तथा सीडीहरु बरामद गरेको थियो ।

अदालतले यस्ता पुस्तकहरु राज्यविरोधी रहेको भन्दै पुस्तकबारे स्पष्ट पार्न अदालतले आदेश दिएको हो ।