काठमाडौं- यो बर्ष देशभर ८० प्रतिशत धान रोपाइँ सकिएको छ । कृषि तथा पशुपन्छी विकास मन्त्रालयलको तथ्याङ्कअनुसार साउन १२ गते सम्ममा ८० दशमलब १८ प्रतिशत धान रोपाइँ सम्पन्न भएको छ ।

गत बर्ष सोही अवधिमा ८१ दशमलब ९२ प्रतिशत रोपाइँ भएको थियो । धान रोपाइँ हुने कुल १३ लाख ७१ हजार ७ सय ६ हेक्टर क्षेत्रफलमध्ये १० लाख ९९ हजार ८ सय ६३ हेक्टर क्षेत्रफलमा मात्रै धान रोपाइँ भएको छ ।

असारको अन्तिम साता परेको अबिरल वर्षाका कारण रोपाइँमा केही क्षति पुर्याएको मन्त्रालयले जनाएको छ । गत बर्षको सोही अवधिमा ११ लाख १५ हजार २ सय ९० हेक्टर क्षेत्रफलमा धान रोपाइँ भएको थियो ।

कुन प्रदेशमा कति प्रतिशत रोपाइँ ?

मन्त्रालयका अनुसार सुदूर पश्चिम प्रदेशमा सबै भन्दा बढी ९४ दशमलब १७ प्रतिशत धान रोपाइँ भएको छ भने सबै भन्दा कम प्रदेश नम्बर १ मा ७१ दशमलब ६५ प्रतिशत सम्पन्न भएको छ ।

प्रदेश २ मा ७४ दशमलव ५० प्रतिशत, प्रदेश ३ मा ७८ दशमलव ८३ प्रतिशत, गण्डकी प्रदेशमा ८४ दशमलव ५६ प्रतिशत, प्रदेश ५ मा ८४ दशमलव ६० प्रतिशत र कर्णाली प्रदेश मा ९२ दशमलव ४० प्रतिशत रोपाइँ सम्पन्न भएको छ ।

सुदूरपश्चिम प्रदेशमा गत बर्षको सोही समयमा ९७ प्रतिशत धान रोपाइँ भएको थियो भने प्रदेश १ मा ७७ दशमलब २४ प्रतिशत रोपाइँ सम्पन्न भएको थियो ।

भौगोलिक अवस्थाअनुसार तराईमा ७९ दशमलव ७८, मध्य पहाडमा ८० दशमलब ६६, र उच्च पहाडमा ८४ दशमलब ९२ प्रतिशत रोपाइँ सम्पन्न भएको छ ।