काठमाडौं– अख्तियार दुरुपयोग अनुसन्धान आयोगले ठेकेदार कम्पनी एमके÷वाईपी जेभीका प्रतिनिधि देवजंग शाहीविरुद्ध भ्रष्टाचार मुद्दा दायर गरेको छ ।

साविक जिल्ला प्राविधिक कार्यालय भोजपुरका तत्कालीन सिनियर डिभिजनल इन्जिनियर लालु गिरीविरुद्धको भ्रष्टाचार मुद्दामा गलत बकपत्र गरेको पाइएपछि अख्तियारले शाहीविरुद्ध भ्रष्टाचार मुद्दा दायर गरेको हो ।

अख्तियारले शाहीविरुद्ध १८ लाख ५० हजार रुपैयाँ बिगो र अधिकत्तम ४ वर्ष कैद सजाय मागदाबी गरेको छ ।

जिल्ला प्राविधिक कार्यालय भोजपुरका तत्कालीन सिनियर डिभिजनल इन्जिनियर लालु गिरीविरुद्धको मुद्दामा शाहीले दावी पक्षका साक्षीका रुपमा बकपत्र गरेका थिए । बकपत्र गर्दा शाहीले अनुसन्धान गरेको कागज व्यहोरालाई अन्यथा हुने गरी प्रतिकूल बकपत्र गरेको अख्तियारको आरोप छ ।

अख्तियारका अनुसार भोजपुर–टक्सार–कोट–गोगने–लेकर्ख सडक स्तरोन्नति योजनाको भुक्तानीका लागि ठेकेदार कम्पनी एमके÷वाईपी जेभीका प्रतिनिधि शाहीले घुसवापत तत्कालीन इन्जिनियर गिरीको बैंक खातामा नगद १८ लाख ५० हजार रुपैयाँ जम्मा गरेका थिए ।