मुम्बई – सन् २०१८ मा रिलिज भएको कन्नड फिल्म ‘केजीएफ’ बक्स अफिसमा कमालको व्यापार गरेको थियो । यो फिल्मले हिन्दी भर्सनमा पनि राम्रो कमाइ गरेको थियो ।

फिल्मको चर्चापछि निर्माण टिमले यो फिल्ममा बलिउड कलाकारलाई पनि अभिनय गराउने भएको छ । नेपालमा समेत राम्रो क्रेज बनाएको यो फिल्ममा सञ्जय दत्तले समेत अभिनय गर्ने भएपछि दोस्रो सिक्वेलको झन् क्रेज थपिएको थियो । यता फिल्म युटिनले एक नायिकालाई पनि दोस्रो सिक्वेलमा अनुबन्ध गराउने निर्णय गरेको छ ।

खबरका अनुसार यो फिल्ममा सञ्जय दत्तपछि रविना टण्डनलाई निर्माण टिमले अफर गरेको छ । भारतीय मिडियाको रिपोर्टअनुसार फिल्ममा रविना टन्डनको मुख्य भूमिका छ । यदि यो खबर साँचो भयो भने रविनाका लागि पनि यो फिल्म विशेष फिल्म हुनेछ । यद्यपि निर्माण टिमले आधिकारिक जानकारी भने दिएको छैन ।

‘केजीएफ’ले ग्लोबल मार्केटमा पनि राम्रो प्रतिक्रिया पाएको थियो । फिल्मलाई कन्नडसँगै हिन्दी, तेलुगू, तमिल र मलयालम भाषामा पनि रिलिज गरिएको थियो । प्रशान्त निलको निर्देशनमा बनेको यो फिल्मले शाहरुख खानको फिल्म ‘जिरो’ लाई टक्कर दिएको थियो । ‘केजीएफ’ मा यशको मुख्य भूमिका थियो ।