मुम्बई – अक्षय कुमार, करीना कपूर, कियारा आडवाणी र दिलजीत दोसाँझको शीर्ष भूमिका रहेको फिल्म ‘गुड न्यूज’ ले दोस्रो दिनमा राम्रो व्यापार गरेको छ ।

फिल्मले पहिलो दिन १७ करोड ५० लाख भारुको कलेक्सन गरेको थियो भने दोस्रो दिन २५ करोडभन्दा बढी कमाइ गर्न सफल भएको छ ।

फिल्मले २ दिनमै ४० करोड भारु कमाएको भारतीय मिडियाले जनाएका छन् । फिल्मको आइतवार व्यापार थप बढ्ने अनुमान गरिएको छ ।

फिल्मले दर्शक र समीक्षकबाट राम्रो प्रतिक्रिया पाएको छ । यो फिल्म अक्षय कुमारको फिल्ममध्ये सबैभन्दा धेरै कमाइ गर्ने फिल्म बन्ने धेरैले अनुमान गरेका छन् ।

फिल्मको कन्सेप्टलाई धेरैले मन पराएका छन् । यस वर्ष अक्षय कुमारका ४ फिल्म रिलिज भए । ती चारै फिल्मले बक्स अफिसमा सफल भएका छन् । यद्यपि ‘गुड न्यूज’ अहिले रिलिजका क्रममा छ ।