काठमाडौं– जुवा खेल्दा खेल्दै पक्राउ परेर रिहाइको माग गर्दै बन्दी प्रत्यक्षीकरण रिट मार्फत सर्वोच्च अदालत गएका ६ जना पुनः हिरासतमै बस्नुपर्ने भएको छ ।

आइतबार बिहान काठमाडौंको महाराजगञ्ज (पिपलमार्ग)बाट पक्राउ परेकामध्ये ६ जनाले आफूहरुलाई गैरकानूनी रुपमा पक्राउ गरी थुनामा राखिएको भन्दै आइतबार दिउँसो सर्वोच्च अदालतमा रिट दायर गरेका थिए ।

तर, रिटको प्रारम्भिक सुनुवाई गर्दै सर्वोच्च अदालतका न्यायाधीश पुरुषोत्तम मण्डारीको इजलाशले ६ जनालाई २४ घण्टाभित्रै अदालतमा उपस्थित गराउन आदेश जारी गरेको थियो ।

सर्वोच्चको आदेशानुसार प्रहरीले ६ जनालाई सोमबार दिउँसो २ बजे सर्वोच्चमा उपस्थित गराएको थियो । तर, सर्वोच्च अदालतले ‘नभ्याइएको’ भन्दै ६ जनाको रिटमाथि सोमबार कुनै आदेश जारी गरेन ।

अदालतले कुनै आदेश जारी नगरेपछि ६ जनालाई पुन: हिरासत फर्काइएको छ ।

सर्वोच्च अदालतका सूचना अधिकारी देवेन्द्र ढकालका अनुसार प्रहरीको जुवा अपरेशनका क्रममा आइतबार बिहान पक्राउ परेकामध्ये ६ जनाका आफन्तले आइतबार दिउँसो सर्वोच्च अदालतमा बन्दीप्रत्यक्षीकरणको रिट दायर गरेका थिए ।

सो रिटमाथि प्रारम्भिक सुनुवाई गर्दै सर्वोच्चले ६ जनालाई नै २४ घण्टाभित्र उपस्थित गराउन भनेको थियो । तर, सोमबार ‘नभ्याइउपछि’ उनीहरुलाई पुनः बुधबार अदालतमा उपस्थित गराउन भनिएको छ ।

अदालतले ६ जनालाई बुधबार ११ भित्रै उपस्थित गराउन भनेको महानगरीय प्रहरी परिसर काठमाडौंको प्रमुख एसएसपी उत्तम सुवेदीले खबरहबलाई जानकारी दिए ।

प्रहरीको जुवा अपरेशनका क्रममा पक्राउ परेकामध्ये बलराम सापकोटा ९बले०, पवनकुमार गुप्ता, पवित्रकुमार कार्की, श्रवणकुमार गोयल, विक्रम गौतम र मुक्ति लामाले बन्द्रप्रत्यक्षीकरणको रिट दायर गरेका थिए ।

रिट दायर गर्नेमध्येका बले भनिने बलराम सापकोटा गुण्डा नाइकेको रुपमा चर्चित छन् । यस्तै, पवित्रकुमार कार्की एयर डाइनेस्टीका एमडी हुन् भने विक्रम गौतम जुवा अड्डा सञ्चालन रहेको घरका मालिक हुन् । गौतम जुवा अड्डा चलाउने व्यक्ति तथा मिनी क्यासिनोका सञ्चालक रहेका प्रहरीले जनाएको छ ।

प्रहरीले आइतबार बिहान महाराजगञ्जको पिपलमार्गबाट २५ जना जुवाडेलाई नियन्त्रणमा लिएको थियो । प्रहरीले उनीहरुको साथबाट २ करोड ६७ लाख रुपैयाँ नगद, ३ लाख रुपैयाँ बराबरको बैंक चेक, कौडा र चेक बूक बरामद गरेको थियो ।