काठमाडौं–राजधानीबाट आज (बिहीबार) प्रकाशित सबै दैनिक पत्रिकाले ताप्लेजुङमा भएको हेलिकोप्टर दुर्घटना, दुर्घटनामा परी ज्यान गुमाउने संस्कृति पर्यटन तथा नागरिक उड्डयन मन्त्रीसहित सातै जनाको विवरणसहितका समाचार मुख्य रुपमा छापेका छन् । नयाँ पत्रिकाले दरबारलाई चुनौती दिने जोसिला विद्यार्थी नेता शीर्षकमा लेखेको समाचारमा आशालाग्दा युवा नेता अस्ताएको खबर छापेको छ ।

त्यस्तै भारत पाकिस्तान तनाव उच्च शीर्षकको अर्को समाचारमा नेपालमा पनि यसको प्रभाव पर्न सक्ने, नेपालले शान्ति र सद्भावका लागि सुझाव दिएको, युद्ध चर्किए नेपालमा आयात र निर्यातमा समस्या आउन सक्ने, गोर्खा राइफल्स पनि युद्धमा परिचालित हुनेलगायतका विषय समेटेको छ ।

त्यस्तै निजी अस्पतालले मनपरी शुल्क असुल्दै गरेको, कमिसन बढाउन ग्यास उद्योगीले हड्ताल गरेको, प्रशान्त सागरमा ल्यानिनो चक्र चल्दा नेपालमा बढी वर्ष भएको खबर छापिएको छ ।

लगानी सम्मेलनअघि शीर्षकमा लेखिएको सम्पादकीयमा लगानीकर्ता आउनुअघि नै लगानीका लागि अनुकूल वातावरण बनाउनुपर्छ, लगानी सुरक्षाको निश्चितता र मुनाफाको दरमा ढुक्क हुने अवस्था निर्माण गर्न सक्नुपर्छ उल्लेख गरिएको छ ।