काठमाडौं– खानेपानी मन्त्री बिना मगरले समतामूलक समाज निर्माणका लागि महिलामाथि हुने सबै किसिमका विभेद र हिंसाको अन्त्य हुनुपर्ने बताएकी छन् । छैटौं अन्तर्राष्ट्रिय महिनावारी दिवसको अवसरमा मन्त्री मगरले जातीय विभेद अन्त्य गरिनुपर्ने धारणा राखेकी हुन् ।

मंगलबार राजधानीमा आयोजित कार्यक्रममा सम्बोधन गर्दै मन्त्री मगरले महिनावारी भएको समयमा महिलामाथि गरिने विभेदको अन्त्य गरिनुपर्ने धारणा राख्दै भनिन्,‘महिनावारी प्राकृतिक र नियमित प्रक्रिया हो, कसैलाई विभेद नगरौं ।’  महिनावारीको विभेद हटाउन भए गरिएका कार्यक्रम लक्षित समुदायसम्म पुगे पुगेनन् त्यस विषयमा अनुगमन र अध्ययन गर्नुपर्ने उनले बताइन् ।

महिनावारी भएकी महिला र जातीय आधारमा गरिँदै आएको छुवाछुतको अन्त्य नभएसम्म महिलाले सम्मानि जीवन जीउने वातावरण श्रृजना हुन नसक्ने मन्त्री मगरको भनाइ थियो । छैटौं अन्तर्राष्ट्रिय महिनावारी दिवसको यस बर्षको नारा ‘मर्यादित महिनावारीः अब त काम थालौ’ राखिएको छ ।