बार्सिलोना- स्पेनको बार्सिलोनामा भएको सवारी दुर्घटनामा परी एक नेपालीको मृत्यु भएको छ । स्याङ्जा विरूवा गाउँपालिका-६ चिन्नेबास स्थायी घर भएका २३ वर्षीय पुजन कोईरालाको शनिबार राति भएको दुर्घटनामा ज्यान गएको हो ।

होम डिलीवरीको काम गर्ने कोइराला कामकै क्रममा दुर्घटनामा परेका थिए । खाना पुर्‍याउन जाँदै गरेका उनलाई फोहोर बोक्ने सवारीले ठक्कर दिएको थियो । ठक्करबाट कोइरालाको घटनास्थलमै मृत्यु भएको गुआर्डिया उर्बाना प्रहरीले जनाएको छ ।

एनआरएनए स्पेनले घटनाबारे परिवारलाई जानकारी गराएको जनाएको छ । एक विज्ञप्ति जारी गर्दै एनआरएन स्पेनले कोईरालाको निधनप्रति दुःख व्यक्त गरेको छ। शव ब्यबस्थापनको लागि प्रक्रिया अगाडी बढाउने र मृतकको परिबारलाइ आर्थिक सहयोग गर्ने निर्णय एनआरएन स्पेनले गरेको अध्यक्ष चिन्तामणि सापकोटाले जानकारी दिए ।