काठमाडौं- इन्डियन प्रिमियर लिग (आईपीएल) मा रोयल च्यालेन्जर्स बैंग्लोरविरुद्ध जीत निकाल्दै दिल्ली क्यापिटल्स् प्लेअफ पुगेको छ । सन २०१२ पछि दिल्ली  पहिलो पटक प्लेअफमा पुगेको हो ।

फिरोज शाह कोट्ला रंगशाला घरेलु टोली दिल्लीले दिएको १ सय८८ रनको लक्ष्य पछ्याएको बैंग्लोरले २० ओभर पूरा खेल्दै ७ विकेट गुमाएर १ सय ७१ रन मात्रै बनाउन सक्यो । बैंग्लोर १६ रनले पराजित भएको हो ।

१२ खेल मध्ये ८ खेल जीतेको दिल्ली १६ अंकसहित शीर्ष स्थानमा उक्लिएको छ ।

बैंग्लोरका लागि अविजित रहेका मार्कस स्टोनिसले ३२ रन बनाउँदा ओपनिङ ब्याट्सम्यान पार्थिव पटेलले ३९ रन बनाए भने गुर्केराट सिंहले २७ रन बनाए ।

यस्तै, कप्तान विराट कोहलीले २३ रन, शिवम दुवेले २४ तथा ए भि डिभिलियर्सले १७ रन बनाएका थिए । बैंग्लोरविरुद्ध दिल्लीका स्पिनर अमित मिश्राले २ विकेट लिए । उनले ४ ओभर बलिङ गर्दै २९ रन खर्चेर २ विकेट लिए ।

कागिसो रबाडा, इशान्त शर्मा र शेरफाने रुथफोर्डले समान एक–एक विकेट लिए । दिल्लीबाट खेलेका सन्दीप् लामिछाने भने बैंग्लोरविरुद्ध महँगा सावित भए । उनले ३ ओभर बलिङ गरेर ३६ रन दिए । पहिलो ओभरमा १५ रन खर्चेका सन्दीपले दोस्रो ओभरमा ११ रन खर्चे भने तेस्रो ओभरमा १० रन दिएका थिए ।

यसअघि, टस जितेर पहिलो ब्याटिङ गरेको दिल्लीले निर्धारीत २० ओभर पुरा खेल्दै ५ विकेट गुमाएर १सय८७ रन बनाएको थियो । दिल्लीका लागि शेरफाने रुथफोर्डले उत्कृष्ट ब्इाटिङ गरे ।

अविजित रहेका उनले १३ बलमा २८ रन बनाउँदै बैंग्लोरविरुद्ध लक्ष्य लम्ब्याएका थिए । यस्तै, दिल्लीका कप्तान श्रयस अयर र शिखर धवनले अर्धशतक प्रहार गरेका थिए । जसमा कप्तान अयरले ५२ रन र धवनले ५० रन बनाएका थिए ।