काठमाडौं– एएफसी यू–१९ महिला च्याम्पियनसिप छनोट अन्तर्गत दोस्रो चरणको छनोट खेलमा नेपाली टोलीले लगातार दोस्रो हार व्यहोरेको छ ।

म्यानमारमा जारी प्रतियोगितामा लगातार दोस्रो हार व्यहोरेको नेपाली टोली आइतबार उज्वेकिस्तानसंग ४–० गोल अन्तरले पराजित भएको हो ।

म्यानमारको मण्डलेस्थित मण्डलर थिरी स्टेडियममा भएको खेलमा नेपाल ४–० गोल अन्तरले पराजित भएको हो । नेपालविरुद्ध उज्वेकिस्तानकी कुर्बोनोभा शानोजाले २१ औं मिनेटमा गोल गर्दै टिमलाई अग्रता दिलाइन् ।

यस्तै, खेलको ६७ औं मिनेटमा शानोजाले व्यक्तिगत दोस्रो गोल गर्दै उज्वेकिस्तानको अग्रता २–० को अवस्थामा पुर्याइन् भने ७४ औं मिनेटमा राशिदोभा तोजिनिसोखोनले र ७८ औं मिनेटमा खोजिभाले गोल गर्दै उज्वेकिस्तानलाई ४–० को जित दिलाए ।

शुरुवाती २ खेल खेलेको नेपाली टोली लगातार २ हार व्येहोरेसँगै अर्को चरणको सम्भावना कमजोर भइसकेको छ ।

यसअघि पहिलो खेलमा अस्ट्रेलियासँग ११–१ गोल अन्तरले पराजित भएको नेपालले अन्तिम खेल मंगलबार म्यानमारसँग खेल्नेछ ।