काठमाडौं– संघीय मामिला तथा सामान्य प्रशासन मन्त्रालयले संघ, प्रदेश र स्थानीय गरी ३ वटै तहमा कर्मचारी समायोजनको काम सम्पन्न भएको घोषणा गरेको छ ।

बिहीबार सिंहदरबारस्थित मन्त्रालयमा पत्रकार सम्मेलन गरेर संघीय मामिला तथा सामानय प्रशासन मन्त्री लालबाबु पण्डितले तीनवटै तहमा स्थायी रुपमा कर्मचारी समायोजन सम्पन्न भएको घोषणा गरे ।

‘केन्द्रीय शासन प्रणालीबाट संघीय प्रणालीमा जाँदा संसारका थुप्रै मुलुकहरुमध्ये कतिपय मुलुकले समायोजनको प्रक्रिया सम्पन्न गर्न सकेका छैनन्, धेरै मुलुक लामो समय अल्झिरहेका छन्,’ मन्त्री पण्डितले कार्यक्रममा भने, ‘विशिष्ट स्थितिको हाम्रो मुलुकले भने समयमै कर्मचारी समायोजनको काम सम्पन्न गरेको छ ।’

मन्त्री पण्डितले अनलाइन प्रणालीमार्फत फारम भर्ने क्रममा केही कर्मचारीबाट भएका कमजोरी र केही गुनासा सम्बोधन गर्ने क्रममा समायोजन प्रक्रिया लम्बिएको बताए ।

कर्मचारीका गुनासा सुन्नका लागि अझै चैत २० गतेसम्मका लागि समय दिइएको मन्त्री पण्डितको भनाइ छ । ‘समायोजनको प्रक्रिया अब सकिसकिएको छ । तर, अझै पनि समायोजनमा परेका कर्मचारीलाई पत्र दिने काम चलिरहेको छ,’ मन्त्री पण्डितले भने, ‘समायोजनका सम्बन्धमा अझै पनि कर्मचारीबाट केही गुनासाहरु आइरहेका छन् । ति गुनासा सुन्नका लागि चैत २० गतेसम्मको समय दिइएको छ ।’

मन्त्री पण्डितले समायोजनमा परेर प्रदेश तथा स्थानीय तहमा गएका कर्मचारीलाई वृत्तिविकास र अवसरबाट बञ्चित नगरिने बताए । ‘राष्ट्रसेवक कर्मचारीलाई प्रोत्साहित गर्ने र उहाँहरुको वृत्तिविकासलगायत सबै कुरामा हामीले संघीय निजामति सेवा ऐन, प्रदेश निजामति सेवा ऐन र स्थानीय सेवा ऐनको मापदण्ड पनि हामीले यहाँ (संघ)मै संसदबाट बनाउने भएकाले यी सबै ऐनमा कर्मचारीलाई वृत्तिविकास र अवसरबाट बञ्चित नगर्ने गरी मापदण्ड तयार गरिन्छ,’ मन्त्री पण्डितले भने ।

प्रदेश र स्थानीय तहको दरवन्दी घटबढ हुन सक्ने

संघीय मामिला तथा सामान्य प्रशानमन्त्री लालबाबु पण्डितले कर्मचारी समायोजनपछि पनि प्रदेश र स्थानीय तहको संगठन संरचना परिवर्तन हुन सक्ने बताए ।

अहिले कर्मचारी समायोजन भएपनि आवश्यकता र औचित्यका आधारमा प्रदेश र स्थानीय तहको दरबन्दी घटबढ हुनसक्ने मन्त्री पण्डितको भनाइ छ ।