काठमाडौं- जाल्टन इब्राहिमोविच आफ्नो पूर्व क्लब एसी मिलानमा पुनः अनुबन्धित भएका छन् । स्वीडेन तथा म्यानचेस्टर युनाइटेडका पूर्व स्ट्राइकर इब्राहिमोविच ३८ वर्षको उमेरमा एसी मिलान फर्किएका हुन् ।

उनले एसी मिलानसँग ६ महिनाको सम्झौता गरेका छन् । सम्झौतमा अर्को सिजन पनि लम्ब्याउन सकिने विकल्प रहेको छ । अमेरिकी मेजर लिग सकरको सिजन सकिएसँगै जाल्टनले एलए ग्यालेक्सी छोडेका थिए । त्यसपछि उनी स्वतन्त्र थिए ।

जाल्टन जनवरी २ मा मिलानमा आउने र मेडिकल गर्ने एसी मिलानले जनाएको छ । आफूले अति सम्मान गर्ने क्लब र शहरमा पुनः फर्किन लागेको इब्राहिमोविचले बताएका छन् ।

इब्राहिमोविच सन् २०१० देखि २०१२ सम्म सिरी ए क्लब एसी मिलानमा थिए । उनले ६१ लिग खेलमा ४२ गोल गरेका थिए ।

सन् २०१८ को मार्चमा एलए ग्यालेक्सी गएका उनले ५३ गोल गरेका थिए । एसी मिलान सन् २०११ यता प्रमुख उपाधि बिहीन रहेको छ । अहिले १७ खेलबाट २१ अंकसहित एसी मिलान सिरी ए को ११ औँ स्थानमा छ ।