एजेन्सी- इंग्लिस प्रिमियर लिग फुटबलमा ब्राइटनले एभर्टनलाई पराजित गरेको छ । शनिबार राति भएको खेलमा ब्राइटनले एभर्टनलाई ३-२ गोल अन्तरले पराजित गरेको हो ।

घरेलु मैदानमा खेलको इन्जुरी समयमा एभर्टनका लुकास डिग्नेले आत्मघाती गोल गरेपछि ब्राइटनले ३-२ को जित निकालेको हो ।

त्यसअघि खेलको १५ औं मिनेटमा पास्कल ग्रोसले गोल गर्दै ब्राइटनलाई अग्रता दिलाएका थिए । तर, खेलको २० औं मिनेटमा आडम वेब्सटरले आत्मघाती गोल गरेपछि एभर्टन खेलमा फर्किएको थियो ।

पहिलो हाफ १-१ गोलको बराबरीमा सकिएको खेलको ७४ औं मिनेटमा डोमिनिक कल्भर्ट लेविनले गोल गर्दै एभर्टनलाई २-१ को अग्रता दिलाए । तर, ८० औं मिनेटमा नेअल मौपभले गोल गर्दै घरेलु टोलीलाई २-२ गोलको बराबरीमा ल्याएका थिए ।

जितसँगै ब्राइटनले १० खेलबाट १२ अंक जोडेको छ । ब्राइटन लिगको १२ औं स्थानमा रहेको छ । १० खेलमा १० अंक जोडेर एभर्टन १६ औं स्थानमा रहेको छ ।

लिग अन्तर्गत नै वेष्ट ह्यामले सेफिल्ड युनाइटेडसँग १-१ गोलको बराबरी खेलेको छ । अर्को खेलमा वाट्फोर्डले एफसी बर्नेमाउथसँग गोलरहित बराबरी खेल्दै अंक बाडेको छ ।