मुम्बई – बलिउडकी दिवंगत अभिनेत्री श्रीदेवीको मुख्य भूमिका रहेको फिल्म ‘मम’ चीनमा प्रदर्शन हुने भएको छ । यो फिल्म चीनमा २२ मार्चमा रिलिज हुने भएको हो ।

एक रिपोर्टसका अनुसार ‘जी स्टुडियो इन्टरनेशनल’ ले फिल्मलाई पोल्याण्ड, रुस, संयुक्त अरब इमिरेट्स, अमेरिका, सिंगापुर सहित ४० राष्ट्रमा रिलिज गरिसकेको छ ।

अब यो फिल्म चीनमा रिलिज हुने भएको हो ।

यो फिल्म जहाँ जहाँ रिलिज भयो, ती सबै ठाउँमा सकारात्मक छाप छोडेको बताइएको छ । जी स्टुडियोजका प्रमुख विभा चोपडाले यो मार्मिक फिल्म एकपटक फेरि बजारमा लैजान लागेको बताइन् ।

श्रीदेवीले सन् २०१७ मा ‘मम’ मा शानदार अभिनय गरेकी थिइन् । उनले पछिल्लो समय फिल्म ‘जिरो’ मा पनि सानो भूमिका निभाएकी थिइन् ।

अभिनेत्रीको २४ फेब्रुअरीमा निधन भएको थियो ।