नयाँ दिल्ली– पाकिस्तानको बालाकोटमा गत फेब्रुअरी महिनामा भारतीय सेनाले गरेको आक्रमणको प्रमुख रणनीतिकार सामन्त गोयल भारतको जासुसी निकाय रिसर्च एण्ड एनलाइसिस विङ रअको प्रमुखमा नियुक्त भएका छन् ।

भारतीय मन्त्रिपरिषद्को नियुक्ति समितिले भारतीय प्रहरी सेवाका वरिष्ठ अधिकारी गोयललाई रअको प्रमुखमा नियुक्त गरेको हो । उक्त समितिको अध्यक्षका रुपमा प्रधानमन्त्री नरेन्द्र मोदीले अहिले जिम्मेवारी सम्हालिरहेका छन् ।

गोयलले सन् २०१६ मा पाकिस्तानमा भएको सर्जिकल स्ट्राइक र यसै वर्ष बालाकोटमा भारतीय वायुसेनाले गरेको कारबाहीको रणनीति बनाएका थिए । गोयलले वर्तमान रअ प्रमुख अनिल धस्मानालाई प्रतिस्थापन गर्नेछन् । उनले आफ्नो अढाई वर्षे सेवापछि उनी आगामी शनिबारबाट अवकाश लिँदैछन् ।