अमेरिका– दादुराको महामारी फैलिएपछि अमेरिकाको न्यूयोर्क राज्यमा रहेको एक काउण्टीले संकटकालको घोषणा गरेको छ । न्यूयोर्क राज्यको उत्तरी भेगमा रहेको रकल्याण्ड काउण्टीले दादुराको महामारी फैलिएपछि संकटकालको घोषणा गरेको हो ।

रकल्याण्ड काउण्टीले दादुराविरुद्धको खोप नलगाएका बालबालिकालाई सार्वजनिक स्थानमा जान प्रतिबन्ध लगाउने घोषणा गरेको छ । काउण्टीको घोषणाको अटेर गरे जरिवाना र ६ महिनाको जेलसजाय समेत हुने बताइएको छ ।

काउण्टीमा पछिल्ला केही समययता १ सय ५३ दादुराको संक्रमण देखिएपछि संकटकालको घोषणा गर्नुपरेको अधिकारीले जनाएका छन् ।
अमेरिकाको इलेनोई, टेक्सस, क्यालिफोर्निया लगायतका राज्यमा दादुराको महामारी देखिएको समाचार सार्वजनिक भएको केही समयपछि न्यूयोर्क राज्यको काउण्टीले संकटकालको घोषणा गरेको हो ।

पछिल्लो समय अमेरिकामा धार्मिक कारण तथा खोप लगाएमा अटिज्म देखापर्नेजस्ता खोपबारे अनर्गल हल्लाका पछि लागेर अभिभाकहरुले आफ्ना बालबालिकालाई खोप लगाउन हिचकिचाउने गरेको बताइन्छ ।

हाल महामारी देखिएको रकल्याण्ड काउण्टीमा कट्टर यहुदी धर्मका मानिसहरुको ठूलो उपस्थिती रहेको र उनीहरु खोप लगाउने कार्यक्रमप्रति सकारात्मक नहुने भएकाले दादुराको महामारी देखा परेको हुनसक्ने न्यूयोर्क टाइम्सले जनाएको छ ।