काठमाडौं- इंग्लिस प्रिमियर लिगमा लिभरपुलले आफ्नो अपराजित यात्रा कायम राखेको छ।

बिहीबार राति भएको खेलमा लिभरपुलले अंक तालिकाको दोस्रो स्थानमा रहेको लेस्टर सिटीलाई ४-० गोल अन्तरले पराजित गरेको हो।

दी किंङ पावर स्टेडियममा भएको खेलमा लिभरपुलका लागि रोबटो फिर्मिन्होले टिमका लागि पहिलो गोल गरेका थिए। उनले खेलको ३१ औं मिनेटमा गोल गर्दै लेस्टरविरुद्व पहिलो हाफमा १-० को अग्रता दिलाएका थिए।

यो सिजनमा अप्रत्याशित तरिकाले लिगमा उत्रिएको लेस्टरमाथि अविजित लिभरपुलले खेलको ७० देखि ८० मिनेटबीचमा ३ गोल गरेको थियो। लिभरपुलका मिलनरले ७१ औं मिनेटमा गोल गर्दा फिर्मिन्होले व्यक्तिगत दोस्रो तथा टिमका लागि तेस्रो गोल ७४ मिनेटमा गरे।

यस्तै एलेक्सजेन्डर अर्नाल्डोले खेलको ७८ औं मिनेटमा लिभरपुलका लागि चौथो गोल गरेका थिए। जीतसँगै लिभरपुल ५२ अंकसहित शीर्ष स्थानमा कायम छ भने पराजित लेस्टरको ३९ अंक छ।