काठमाडौं – भिषण राईले निर्देशन गरेको फिल्म ‘पुरानो बुलेट’ लाई हङकङमा प्रिमियर गरिएको छ । शनिवार हङकङस्थित याउ माइ तेइ हलमा गरिएको फिल्मको ग्राण्ड प्रिमियरमा दर्शकले फिल्म मन परेको प्रतिक्रिया दिएका छन् ।

पूर्वी नेपालको कुनै गाउँको कथालाई समेटिएको यो फिल्ममा अनुपविक्रम शाही, वर्षा शिवाकोटी, माला लिम्बु लगायतको शीर्ष भूमिका छ । हङकङमा आयोजना गरेका आयोजकका टिम मेम्बर मज्जाको राईले फिल्मले उठाएको नेपाली मौलिकतालाई हेर्न पाउँदा दर्शक खुशी भएको बताए ।

न्यानो काख अभियानको सहयोगार्थ राखिएको च्यारिटी शोको प्रदर्शनीको जिम्मा अनोज रोका, मज्जाको राई, विजय लिम्बु, सरु राई र सुनिता आङदम्बेले गरेका थिए ।

नेपालमा चैत्र ९ गते रिलिज हुने यो फिल्मको कथा तथा पटकथा निर्देशक राईले कार्यकारी निर्माता सन्तोष राईसँग मिलेर लेखेका हुन् ।
फिल्ममा अशोक कुमार राई, टिकाराम राई, विरेन साम्बा र दिपक लिम्बुको लगानी रहेको छ ।