काठमाडौं–नेपाली कांग्रेसको भ्रातृ संगठन नेपाल विद्यार्थी संघमा दुई खेमामा विभाजित विद्यार्थी नेताबीच भएको कुटाकुटको विषय अहिले चर्चामा छ । पार्टी कार्यालयमै विद्यार्थीबीच कुटाकुटा हुँदा कांग्रेस नेता मौन शीर्षकको मुख्य समाचार नयाँ पत्रिकाले छापेको छ ।

दुई पक्षबीचको झडपले उग्ररुप लिँदै नियन्त्रणका लागि प्रहरीले लाठी चार्ज गर्नुपर्ने अवस्था आउँदा पनि कांग्रेस नेतृत्व भने मौन रह्यो । कांग्रेस नेता कृष्ण सिटौलाले यो समस्या समाधान गर्न नेतृत्वले नचाहेको भन्दै बैठकमा नेविसंघको झगडा हामीले झ्यालमा बसेर हाँस्दै हेर्‍यौ । समस्या समाधानका लागि कुनै उपाय निकालेनौ भनेका छन् । यो विषयमा नेताहरु गगन थापा, प्रदीप पौडेलले केन्द्रीय समितिमा कुरा उठाउन खोजेपनि सभापति देउवाले यस विषयमा बोल्न जरुरी छैन भन्दै रुलिङ नै गरेको एक केन्द्रीय सदस्यले बताएका छन् ।

न्यायपरिषदले तानेका ११ न्यायाधीशमाथि छानबिन हुँदै शीर्षकको अर्को समाचारमा न्यायसम्पादनमा लापरबाही गरेको भन्दै विभिन्न जिल्ला र उच्च अदालतबाट तानिएका ११ न्यायाधीशमाथि न्यायपरिषदले छानबिन गरिरहेको छ । छुट्टाछुट्टै तीन समिति बनाएर छानबिनको काम अघि बढिरहेको छ ।

त्यस्तै मुक्त कमैया र हलिया पुर्नस्थापनामा ५ अर्ब ३३ करोड सकिएपनि समस्या समाधान नभएको, प्रदेश र स्थानीय तहका कर्मचारीले ट्रेड युनियन खोल्न नपाउनेलगायतका समाचार मुख्य रुपमा छापिएका छन् ।