एजेन्सी– इरानका विदेशमन्त्रीले फ्रान्समा भएको जी सेभन सम्मेलनमा भ्रमण गरेपछि अमेरिकी प्रतिनिधिमण्डल आश्चर्यचिकत भएको छ।

पहिले घोषणा नगरिएको भएपनि इरानका विदेश मन्त्रीले जी सेभेनको सम्मेलनमा संक्षिप्त भ्रमण गरेका थिए ।

विश्वका ठूलो अर्थतन्त्र भएका सात राष्ट्रको उक्त सम्मेलनमा इरानका विदेशमन्त्री जावेद जरिफ सहभागी भए जसमा अमेरिकी राष्ट्रपतिसहित विश्व नेताहरू भेला भएका थिए ।

बीबीसीका अनुसार अमेरिकी प्रतिनिधिमण्डल जरिफको भ्रमणबाट आश्चर्यचिकत भएको छ । अमेरिकाको इरानसँग तनाव चुलिएका बेला जरिफले राष्ट्रपति ट्रम्प सहभागी भएकै सम्मेलनमा सहभागिता जनाएका हुन् । जरिफले सामाजिक सञ्जाल ट्विटरमा फ्रान्सका समकक्षी र राष्ट्रपति दुवैसँग आफ्ना रचनात्मक वार्ता भएको बताएका छन्।

“अगाडिको बाटो कठिन छ तर प्रयास गर्नुपर्ने पनि छ,” आइतवार साँझ उनले लेखेका छन् । उनले ट्विटरमै आफूले जर्मनी र ब्रिटेनका अधिकारीहरूसँग पनि सङ्क्षिप्त भेटघाट गरेको उल्लेख गरेका छन्।

जरिफले फ्रान्सका राष्ट्रपति एम्यानुअल माक्रोँसँग सम्मेलनको पूर्वसन्ध्यामा शुक्रवार पेरिसमा भेटेका थिए।